أفيش

الفن بطريقتنا

محمود البزاوي .. أحبك ولا أكرهك؟

مايو 5, 2020 11:29 ص -- بورتفوليو

في أكتوبر 2017، اتعرض لأول مرة مسلسل “سابع جار” وقلب الدنيا ساعتها عشان جاب نماذج موجودة ف الواقع، بس ناس كتير مش حابة تشوفها أو تعترف بوجودها من خلال الدراما. أحد أهم الشخصيات دي كان “مجدي الصافوري” اللي عمل دوره الفنان الجميل محمود البزاوي .

التكّة ف شخصية “مجدي الصافوري” كانت إنه نموذج متقدرش تصنفه، ممكن تضايق منه وتتنرفز لأنه زوج غير مسئول وأب مهمل عمل عقدة لبنته واتسبب ف جوازة فاشلة لبنته التانية لكن متقدرش تكرهه لأنه حنيّن ودمه خفيف، وبيعمل لقطات حلوة.

من مسلسل سابع جار

يعني لما هبة “سارة عبدالرحمن” خطوبتها اتفكت، ظهر من العدم عشان يواسيها، ويقف جمبها، ويقويها بكلامه، ويعوضها عن أبوها اللي مات، في مشهد كان رقيق جدا ويلمس القلب.

فكونك مش عارف تحبه ولا تكرهه، لأنه نموذج شديد الواقعية بيعمل اللي يخليك تبقى عايز تحضنه ساعات، واللي يخليك مش طايق تبصله ساعات تانية.
هو البني آدمين كده ميكسات، مش قطر ماشي على خط، لا الطيب جميل ولذيذ طول الوقت، ولا الشرير رافع حواجبه والخبث بيطأ من عينيه وسهل تميزه دايما .. خالص!.

البزاوي وسارة عبد الرحمن

محمود البزاوي شاطر وعبقري ولا شطارة ورق مكتوب كويس؟

محمود البزاوي خلاني سألت نفسي ساعتها هي دي شطارة وعبقرية من الأستاذ محمود البزاوي إنه يعمل الدور بشكل حقيقي وتلقائي كده ولا كتابة الدور نفسها كويسة؟

لأنه بعدها بشهرين تقريبا اتعرض مسلسل أبو العروسة، وظهرت شخصية طارق (محمود حجازي) اللي كان شخصية مثالية نوعًا بس روحه مكانتش خفيفة، مش عايزة أقول سمج.

اقرأ المزيد مسلسل رجالة البيت ..من هو المؤلف أيمن وتار الذي وصفه الجمهور بـ”رجل البيض”؟

بس اتأكدت إن الموضوع مش بس كتابة كويسة، لأ هي روح أستاذ محمود البزاوي اللي بتطلع في أدائه وتخليك تحبه، مهما كان الشخصية اللي بيلعبها تنرفزك جدا ومتحبش تتعامل معاها ف الحقيقة، لمّا شوفت دوره السنة دي ف مسلسل “فرصة تانية” وهو أب لولدين.

واحد منهم مقضيها لعب ببنات الناس، يخطب، ويعرف على خطيبته، ويتجوز ويمشي يوم فرحه، ويطلق، ويتشقلب لخطيبته تاني وهيصة، وأبوه مبياخدش موقف واحد حازم معاه خالص غير “اهدا يا زياد عشان نتصرف بالعقل”، وده يوضح إنه أب بشخصية ضعيفة جدًا وميعتمدش عليها ف مواقف جادة.

لما طليقة ابنه ريهام أيتن عامر انتحرت فبيته اتصل بابنه عشان ييجي يتصرف، مع إن هو الكبير، بس بردو متقدرش تمنع نفسك من إنك تحبه بسبب لطفه وخفة دمه في ردود أفعاله، وإنه بردو ليه لقطات جدعنة وذوق ف حتت معينة.

زي لما مَلَك “ياسمين صبري” راحتلهم البيت وهو قعد يقدملها عصير وسمبوسة ورز بلبن وفاكهة وصينية بطاطس أو بامية كترحاب عشان ف بيتهم وكرم ضيافة، كلقطة جميلة وأصول جدًا.

بينفع الأب والزوج يبقى part-time؟

هل حبك لشخص روحه خفيفة وقعدته حلوة وليه حركات جدعنة ساعات بس هوائي ومبيتحملش المسئولية .. كفاية؟

أو راحتك مع شخص هادي ولطيف ومهاود معظم الوقت لأنه مبيصطدمش معاك ومالوش ف الخناقات وبيبعد عنها وليه حركات ذوق ولطف لكن ضعيف ومبياخدش موقف .. كفاية إنه يخليك تبدأ علاقة طويلة الأجل معاه؟ سواء شغل وبيزنيس وشراكة أو جواز وخلفة وأسرة وبيت؟

هل الكاريزما أو اللطف كفاية ينجّحوا شركات أو يبنوا بيوت؟

معرفش .. بس اللي أعرفه كويس إن أستاذ محمود البزّاوي ممثل جميل جدًا وشاطر جدًا، ويستحق أدوار ومساحات أكبر وأكتر لأن لسه عنده اللي نفسنا نشوفه، وإني بحبه وبستنى طلّته ع الشاشة جدًا جدًا جدًا.

Facebook Comments