أفيش

الفن بطريقتنا

500 Days of summer .. الفريندزون كما لا يجب أن يكون

يونيو 24, 2020 2:08 ص -- اجنبي

لو بتدور على فيلم بيتكلم عن الفريندزون بنرشحلك بقوة 500 Days of summer واللي بيبدأ بملاحظة المؤلف: «أي تشابه بين أحداث الفيلم وأشخاص الواقع هو محض صدفة.. خاصة أنتي يا جيني بيكمان.. أيتها العاهرة»

عشان نعرف من الانترو ده حاجتين: اولا إننا قصاد فيلم رومانسي مختلف من أول دقيقة، وإننا هنقابل أحداث حقيقة زي اللي بتحصلنا في الحياة وأشخاص من الواقع زي اللي بنقابلهم يوميًا، وخازوق العلاقات اللي كلنا لبسناه بلا استثناء “الفريندزون”

الفيلم سينمائي بحت، بيصور بس طبيعة العلاقات من النوعية دي.. إزاي بتبدأ بين طرفين، منهم طرف ساذج “على نياته” وإزاي بتنتهي بصدمة نفس الطرف الأضعف لمرحلة الهشاشة العاطفية، بدون ما يقولك -انت كمشاهد مسكين- إزاي تتجنب خانة الفريندزون أو تعمل إيه لو اتحطيت فيها.. لكن لو مصمم أوي .. إحنا هنقولك في آخر الريفيو.. (شايفك وأنت بتجري المقال عشان توصل لآخره)

فيلم 500 Days of summer .. الفريندزون من علاقة لفيلم

خلونا نحكي القصة من خلال أبطالها توم وحبيبته سمر (أو اللي كان فاكرها حبيبته) من غير ما ننحاز لطرف على حساب آخر..

فيلم 500 Days of summer

توم شاب رومانسي حالم، الهيدفون مابتفارقش ودانه، اتعرف على الحب من أفورة الأغاني المبالغ فيها، وصدق في حجات خيالية زي الحب من أول نظرة..

وزي ما في ناس بتعيش تبحث عن الله وناس تانية بتبحث عن الذات وتالتة بتبحث عن المعنى والهدف، فتوم كان بيبحث عن الحب

على النقيض كانت سمر، بنت جميلة شكلا، بليدة المشاعر، ربما ده راجع لإحساسها بجمالها اللي بيخلي الحب دايما هو اللي بيبحث عنها مش العكس..

مراية الحب عامية.. و الفريندزون كمان

توم طول الفيلم بنشوفه بيعمي نفسه لا شعوريًا عن الرسايل اللي كانت إنذار بالخطر، وكأن المؤلف بيقول لنا لو مراية الحب عامية، فمراية الفريندزون عامية وطارشة وفاقدة كل الحواس

وعشان مانبقاش بنتكلم وخلاص، وجايين على توم، خد عندك يا سيدي:

  • في أول لقاء بينهم توم عينه ماتشالتش على سمر كأنه اتسحر، في الوقت اللي كانت سمر بتوزع نظرتها على كل اللي في الغرفة وعنيها جات عليه ثانيتين بشكل عابر زيه زي غيره
  • في أول تعارف بينهم سمر صرحتله إنها عمرها ما بحثت عن علاقة عاطفية جادة ولا بتشعر بحاجتها للحب، لكنه قالها بنبرة تحدي: هتحسي بالحب لما تقابلي الشخصي المناسب (أيوا وكان فاكر نفسه هو الشخص المناسب اللي هيغير قناعاتها)
  • سمر كانت بتحب شعرها الطويل وبتحب إحساس التخلص منه بدون ندم (يعني اهرب يا تووم ملهاش عزيز)
  • سمر لبسها كله كان فواتح… ألوان زاهية.. أبيض وأخضر.. وأزرق زي لون عنيها، بس توم كان بيلبس غوامق ولما بيلبس فاتح كان بيبقى رمادي (وده بيعكس اختلاف الشخصيتين وتعايش توم مع الرمادية وعدم الوضوح زي العلاقة اللي بيمر بيها)

توم وسمر 500 days of summer

أحلى ما في فيلم .. رموزه

رمزيات الفيلم كانت أحلى مافيه مثلا:

  1. بعدما توم قضى أول ليلة مع سمر شوفناه بيرقص ويغني ويسلم على كل اللي في الشارع، والنافورة بتشتغل أول ما يمر بيها وكأنه اتصالح مع الحياة والدنيا بدأت تضحكله
  2. بنشوف توم لما بيتعصب بيكسر الأطباق، وكأن المخرج بيقول لنا توم طيب بشكل طفولي (غير ناضج)
  3. الهيدفون اللي كانت جزء من شخصية توم لحد ما تخلى عنها بعد الانفصال عن سمر في إشارة إنه كفر أخيرا بمبالغات أغاني الحب
  4. اسم البطلة Summer أو صيف بالعربي كان له دلالة، إنها مجرد فصل سيء في رواية توم

توم 500 يوم من الصيف

اصحى للدرس المستفاد

ممكن تتهم توم بالسذاجة والغباء وتقول يستاهل اللي حصل له، زي ما ممكن تتهم سمر بالبلادة والأنانية أو حتى تقول عنها عاهرة زي ما وصفها صديق توم وبرده يبقى عندك حق

كل واحد هيشوف الفيلم بوجهة نظره، وهيحكم ع الطرفين بناء على تجاربه السابقة، وسواء كان حكمك ظالم أو عادل.. محايد أو متطرف فده مش مهم أوي.. لكن المهم إنك تطلع بحاجة من الفيلم قد تفيدك في تجاربك الشخصية.

  • زيّ إنك تدخل علاقاتك العاطفية مفتّح لأي رسالة صادرة من الطرف الآخر..
    مابنقولكش تبقى ردار بس ع الأقل تنتبه الطرف التاني شايفك إزاي وحاطّك في أي خانة عشان تقلل احتمالات الندم فيما بعد
  • ماتعليش في سقف توقعاتك من الأشخاص والعلاقات، أو زي ما بيقولوا (من لا يتوقع شيئًا فلن يخيب ظنه أبدًا)
  • بلاش تربط بين الجمال الخارجي والداخلي.. البنت الأجمل شكلًا مش بالضرورة تكون أكثر شاعرية ورومانسية، ممكن يبقى قلبها أبرد من مكعب تلج عادي جدا
  • تقبل الهزيمة في الحب بروح رياضية بدون دراما زيادة.. حلل التجربة واطلع بدرس للمرات الجاية، ولو عرفت تحول الهزيمة لمكسب زي ما عمل توم الحقيقي (مؤلف الفيلم) اللي قدم لنا من معاناته عمل سينمائي عظيم طلع فيه لسانه وصباع الوسطى للإكس بتاعته جيني بينكمان، ووصفها بالعاهرة على مرأى ومسمع الملايين اللي شافوا الفيلم.

    500 Days of summer .. أحسن فيلم اتعمل عن الفريندزون

اقرأ أيضًا:

التدخين يتسبب في تدمير رئة رجاء الجداوي .. والأطباء: هي في رعاية الله

لو حابب تشترك على قناتنا ع اليوتيوب: من هنا

 

Facebook Comments