أفيش

الفن بطريقتنا

رحلة سلق البيض.. عمرو راضي من الكوميديا البيضـ اء إلى الاتجار بالبشر

يونيو 24, 2020 4:54 ص -- بره الكادر, تريندي

حاسبوا عمرو راضي فيديو أدويوة كورونا

لو دخلت على تويتر صدفة في الـ 24 ساعة الأخيرة هيصادفك هاشتاج حاسبوا عمرو راضي الأكثر تداولًا في المركز الأول على مستوى مصر، لو لسه مش عارف السبب.. إحنا هنحكيلك باختصار

عمرو راضي شاب من اللي بيتقال عليهم سوشيال ميديا انفلونسرز، بالعربي من المؤثرين على السوشيال ميديا، مؤثر بعدد الفانز والفولورز، لكنه في الحقيقة لا يؤثر إلا سلبًا على شريحة من الأندرإيدج اللي بيتابعوه، واللي لو شافوه في الشارع بيوقفوه يتصوروا معاه!

عمرو بدأ رحلة “سلق البيض” من عام 2014، بفيديوهات ساخرة، واشتهر بتقليد مدحت شلبي، في الوقت اللي كان كابتن مدحت راكب الترند بعد محمود بكر، قبل ما يجي كابتن أيمن الكاشف ويخطف منه الشو.

لما مامتك تعملك باسم يوسف في البيت

لأن السوشيال ميديا تجيد صناعة النجوم من الأقزام، مادام القزم بيجيب رقم قصاده 6 أصفار من المشاهدات، حتى ولو كان كل موهبته إنه بيعرف يتصور فيديو بالكاميرا السيلفي.. هوب اتفاجئنا ببروباجندا كبيرة من قناة النهار، لبرنامج الكوميديان الساخر اللي دمه يلطش عمرو راضي تحت عنوان “مايصحش كده”..

القناة صورت وقتها عمرو على إنه باسم يوسف الجديد، باستنساخ نفس الفكرة، والتقنيات البصرية، حتى طريقة رمي الإيفيهات، ولون الخلفية الأزرق.. ولكننا نحذر من أن مشاهدة مقدمة أول حلقة فقط تثير الغثيان أما الحلقة كاملة قد تفقدك القدرة على الإنجاب.. فقط حاول أن تصمد دقيقتين في مشاهدة هذا المقطع

الحمد لله البرنامج وقف بعد 13 حلقة فقط، والسبب: ماكانش حد بيضحك من البرنامج غير مقدم البرنامج! رغم إن فريق الإعداد ناس بتعرف تكتب كوميديا ومكسرين الدنيا ع السوشيال زي عمرو وهبة، اللي شارك مؤخرًا في مسلسل فلانتينو مع الزعيم عادل إمام، وهشام منصور صاحب برنامج العلم والإيماو، وشريف الألفي.

ولأن البيض لما بيفقس، خلاص مابيبقاش صالح للأكل أو الهضم، بدأت مشاهدات والتفاعل على حسابات عمرو راضي في النازل، والناس بدأت تدوّر على أراجوز تاني دمه أخف..

الأراجوز الأولاني بدل ما يستوعب الدرس، ويشوفله شغلانة، قرر يشتغل نفسه، وقام عمل لايف مشترك مع جوهرة الراقصة على انستجرام في رمضان، عشان يجيب أي تفاعل يخلي برنامجه التاني يتشاف.. أيوا برنامجه التاني أنت قريت صح..

ما وراء الإسفاف

#حاسبوا_عمرو_راضي

قناة النهار قررت تديله فرصة تانية -لسبب لا نعلمه- في رمضان 2020 ببرنامج مقالب اسمه “المهزراتية” لكن تقريبًا ماحدش سمع عنه غير مننا دلوقت، وده كان الفشل التليفزيوني التاني على التوالي

وبعد الفشل مرة واتنين ماكانش فاضل من عمرو إلا أنه يقلع هدومه لاستعادة الانتباه، قام ماكدبش خبر وقلع فعلا، ولبس بامبرز كبار السن، في فيديو مفتعل مضمونه “لازم نكبر عشان المجتمع كله بقى عقله صغير” كرد فعل، قام المتابعين شتموه وأجبروه على حذف الفيديو عشان يفشل مرة تالتة حتى في القلع..

قصة هاشتاج حاسبوا عمرو راضي

كل اللي فات يمكن تمريره بإلغاء متابعة عمرو راضي، أو حتى ريبورت على المحتوى السطحي اللي بيقدمه، لكن ما بدر منه مؤخرًا في فيديو أدوية كورونا، الجمهور شاف إنه لازم له وقفة، وفعلوا هاشتاج حاكموا عمرو راضي.. المرة دي مش بتهمة الإسفاف ولكن بتهمة الاتجار بالبشر وآلامهم لحصد اللايكس والشير..

عمرو طلع في فيديو في غرفة مليانة على آخرها بمستلزمات طبية- على طريقة المخازن، وقال نصًا: إحنا حوشنا 10 آلاف علبة دواء “لاكتوفرين” -اللي بيستخدم في علاج بعض حالات الكورونا – واللي مش موجود في أي صيدلية، ده غير الماسكات الطبية، وكراتين الكحول الـ 70% الخام..

وفي آخر الفيديو عمرو طالب الناس يعملوله متابعة وشير للفيديو، لو عايزينه يتبرع بالمستلزمات الطبية والعلاجية دي للمرضى المستحقين عشان ينقذهم من الموت.. لكن الجمهور في رد فعل واعي قرر يشارك الفيديو فعلا على نطاق واسع مش بغرض إنقاذ المرضى من الموت، ولكن لمناشدة المسئولين بإنقاذنا من عمرو راضي أو على الأقل علاجه وتأهيله نفسيا، لأن فعل خسيس زي ده لا يصدر إلا عن مجرم أو مجنون.

اقرأ أيضًا:

أسرار في قصة حنين حسام.. الصين خطر يواجه مصر

 

قصة هاشتاج حاسبوا عمرو راضي

Facebook Comments

2 thoughts on “رحلة سلق البيض.. عمرو راضي من الكوميديا البيضـ اء إلى الاتجار بالبشر

Comments are closed.