أفيش

الفن بطريقتنا

«قصة حب» هنا الزاهد وأحمد حاتم قبل فيلم الغسالة

يوليو 25, 2020 12:51 م -- عربي

بوستر فيلم الغسالة الرسمي
قبل ما تقرر تخش فيلم الغسالة ، لمحمود حميدة وأحمد حاتم وهنا الزاهد وشيرين رضا، قررنا نسهلها عليك، ونعيد نشر مراجعتنا لفيلم قصة حب كأول فيلم يجمع بين الثائي حاتم وهنا..

قصة حب أحمد حاتم وهنا الزاهد قبل فيلم الغسالة

ندخل في الموضوع علطول.. فكرة البطل الكفيف اللي بيلاقي في علاقة الحب البديل لنور عينيه بتستهويني عامة، حتى ولو كانت أفلاطونية، لكنها بتحصل وهنا هستأذنك تشوف حلقة «مينا نشأت ومريان رسمي مع منى الشاذلي» عشان تلمس جمال تفاصيل القصص من النوعية دي اللي بتقوم على حب صادق..

فكر معايا كده، إنسان بيحب حد من غير مايشوفه، وفي المقابل الطرف التاني بيحبه ومتقبله بقصوره -مقارنة بغيره من البشر، واللي مش بإيده بالمناسبة- هنا الحب خام وحقيقي، بدون أي تدخل لزيف المظاهر أو تأثيرها.. وفكرة التكامل فارضة نفسها..
بعيد عن صداع الفيلم منحوت من أنهي فيلم أجنبي، فاحنا قدام عمل رومانسي خفيف بدون «تلزيق» الأفلام العربي المعتاد، وفي نفس الوقت كوميدي درامي بجرعات مقبولة..

أحمد فهمي: فيلم قصة حب كسر الدنيا

والألطف إن الأبطال مش نجوم شباك لكن أدوا دورهم حلو، بالذات هنا الزاهد اللي فاجئتنا -ربما لأول مرة- إنها بتعرف تمثل، وحقيقي ماقدرش أحكم هل ده تطور موهبة، ولا جودة نص ومخرج طلعوا من الممثلين أفضل ما عندهم.. وده الرأي الأرجح خاصة إن المخرج عثمان أبو لبن أجاد تقديم أحمد حاتم كممثل جيد مرتين، الأولى في مسلسل فيرتيجو اللي يعتبر واحد من أفضل أدوار حاتم قصاد الجميلة هند صبري، والتاني كبطل أول لفيلم قصة حب..

أخيرا لو هتتفرج ع الفيلم بتوقعاتك المسبقة لفيلم أبطاله هنا الزاهد وأحمد حاتم، اللي هما أقرب لسوشيال ميديا انفلونسرز من كونهم ممثلين، بالإضافة لتيمة العلاقة بين طرفين أحدهما كفيف وبيفتّح كونها اتحرقت في أفلام مصري وأجنبي، تسمحلي أقولك توقعاتك هتخيب، لأنك هتشوف أداء مختلف للبطلين، ومعالجة مختلفة للقصة.. من الآخر هتشوف فيلم لطيف.. وآه ماتنساش تشوف حلقة منى الشاذلي اللي ذكرناها فوق.. هي على مستوى جمال الفيلم..

اقرأ أيضًا:

فيلم 2014 In your eyes .. عينيكي دول مرايات مرسوم أنا فيهم

 

اشترك بقناتنا على اليوتيوب: من هنا

Facebook Comments